අප‍ව ගොන්පා‍ට්කර අපටම විකිනීම

"මෙතෙක් අන් අය කළ දේ බැලූ ඔබ, හෙට ඔබම කළ දේ නරඹන්න"
සිරස සුපර් ස්ටාර් තෙවන වටයේ වැඩසටහනක් අවසාන‍ෙය්දී නිහාල් වික්‍රම එදිරිසූරිය විසින් මේ සදහන් කරනුයේ අනුන්ගේ ගොන්පාට් රසවිදි අපට තමන්ගේ ගොන්පාට් හෙට දිනයේදී බලන්නට එන ලෙස කෙරෙන්නාවූ සමච්චල් සහගත ආරාධනයයි.
ගීත තරගයකින් ලොවම දිනන්නට කතා කරන සිරස දැන් ඒ ජයග්‍රහණයේ බලාපොරොත්තුව වෙනුවෙන් ගොන්පාට් කරන ලාංකික තම ප්‍රේක්ෂක පිරිස ගොන්පාට් වන ආකාරය නැවතත් තම ප්‍රෙක්ෂකයින්ටම පෙන්වා සතුටු වන ආකාරය විකුණමින් සිටී.
තමන් විසින් ගොන්පාට් කරවමින් සිටි තම ඉලක්ක ගත පිරිස හොදින් ගොන්පාට් සිදුකරන බව කාලානුරූපීව දැනගත් සිරස ඔවුන්ගේ සියළු ගොන්පාට් සදහා වේදිකාවක් සකසා දීමට තරම් කාරුනික වී තිබේ. එය රූපවාහිනියේ ජනප්‍රියතම වැඩසටහන බවට පත් වීමටද බොහෝ ඉඩකඩ ‍තිබේ.
ලක්ෂ ගණනක කකුල් දෙකේ හරක් රැළ දැක්කීම සදහා සිරසු සුපර් ස්ටාර් කිරුළ නැමැති ඇම දමන විට ඒ ඇම ගිලීම සදහා මේ රැළ ගොන්පාට් කෙලින්න පටන් ගෙන ඇත. සැබැවින්ම සිරසේ නවමත මාකට් එක, අරමුණ මෙකී ‍ගොන්පාට්ය.
මේ ක්‍රියාවලිය තුළ දේශපාලනික පැහැදිලිකීරීම් කිහිපයක් සිදුකරගත හැක.
1. වසර 2500කටත් වඩා එහා ගිය උරුමයකින් ගොඩනැගී යැයි කියන බහුතර ජනතාව ගොන්පාට් පිරිසක් බව, එනම් යුද්ධයට අත්පුඩි තලන (මට අනුව සිරසේ ගොන්පාට් වන්නන් යුද්ධයට අත්පුඩි තලන්නන්ගේ උපකුලකයකි) දේශප්‍රේමී සිංහල බහුතරය සිරස වෙනුවෙන් ගොන්පාට් වන්නන්ය. සීනිබෝලයක් වෙනුවෙන් තම ආත්මය පාවා දෙන්නන්ය.
2. සිරස හොදත් කරනවා, නරකත් කරනවා, ඔය දෙකම හොදටම කරනවා යැයි පුටුවක් උඩට වී කකුල් හොලවමින් කියූ පැත්තක් නැති ගෙම්බන්ට දැන් සිරසෙන්ම පැහැදිලි කර දී ඇත්තේ තමන් අම්මා , තාත්තා පමණක් නොව සනුහරේ වුවද විකුනාගෙන කෑමට සූදානම් පිරිසක් බවයි.
ඉහත කරුණ තවත් පුළුල් අර්ථයකින් ගතහොත් ලිබරල් ආර්ථිකයේ අදුරු මුහුනුවර සිරස මගින් තවත් හොදින් ප්‍රකාශකරන බවයි. එය ඒකේ හොදත් තියෙනවා නරකත් තියෙනවා යැයි මග අරිමින් සිටි පිරිසට දේශපාලන සමාජ වෙනසකට එක් වීමට බලකරනු ලබයි.
අපේම අයියලා, අක්කලා, නංගිලා , මල්ලිලා පමණක් නොව වැඩිහිටියන්ද ගොන්පාට් කරන විට අප ද ඉන් වින්දනයක් ලබමු. අප සිනාසෙනුයේ අපගේම පිරිසට බව, සමාජ පංතියට බව ඔබට නොවැටහෙන්නේ මන්ද?
භාතිය සන්තුෂ්ලා, ඉරාජ් රනිදුලා මෙන්ම අහසෙන් වැටෙන කොළඹ හතේ කොල්ලන්ට එම් එන්ටර්ටේයින්මෙන්ට් නොමිලේ තරු බවට පත්කරන විට ඊට යට පන්තියේ සිටින අපට තරු බවට පත්වීමට නම් ගොන්පාට් කළ යුතු යැයි මහාරාජා විසින් රැග් කරනු ලබයි. පිරිසකට නොමිලේ ප්‍රචාරයත්, පිරිසකට ආත්ම අභිමානය පාවාදීමටත් බලකරන මේ ක්‍රියාවලිය කුමක්ද?
සිරස, භාතිය සන්තුෂ්ලා, අජිත බංඩාර ලා සමස්ත ව්‍යූහයේ සංකේතයන් පමණි. සන්ලයිට්, ඩයලොග්, ඇන්කර්, සෙලින්කෝ, කීල්ස් ඇතුළු එකී මෙකී නොකී සියළු පාර්ශව අනියමින් හෝ නිශ්චිත බහුතරයක් කවර ආකාරයකින් හෝ ‍ගොන්පාට් කිරීමක් සිදු කරමින් සිටිති. එය සංස්කෘතිය, සදාචාරය, පාරි‍භෝජනවාදය, ආත්මාර්ථය ට මුලා වී තව දුරටත් මගහරිමින් සිටිනවාද? ඔබ විසින් මේ තත්ත්වය තේරුම් ගැනීමම ඉතිහාසය වෙනස් කිරීමේ මූලික පියවරයි.