සෞන්දර්යේ නිම් ඉම් සොයා

සමාජයේ ඇති සියළු ප්‍රපංචයන්හි සිදුවන සියළු ක්‍රිකාරකම් සමස්ත සමාජ ක්‍රියාකාරීත්වයෙහි අතුරුඵලයක් මිස ඉන් වියුක්ත වන්නක් නොවේ. පසුගිය කාලයේ අප විසින් ලංකාවේ විද්යුත් මාධ්‍ය වැඩසටහන් පිළිබද විවිධ අදහස් පළකළේ ඉල්ලුම සැපයුම මිල යාන්ත්‍රණය මත ක්‍රියාත්මක වන පුද්ගලික අංශයේ මාධ්‍ය යන් තුලින් වන නිශේධනාත්මක ප්‍රතිඵලයන් පිළිබදය.සුභසාධන ආර්ථිකයක සිට ක්‍රම ක්‍රමයෙන් ලිබරල්වාදී ආර්ථික බූවල්ලාට හසුවෙමින් පවතින ලංකාවේ රාජ්‍යන මාධ්‍ය පවතින ආණ්ඩුවේ බලපෑමත්, පරිපාලනය සියයට සීයයක් ලාභ උපරිම කිරීමේ ක්‍රියාවලිය අරමුණු කොට නොගත් නිසාත් ප්‍රාග්ධන තර්කනයේ නියමයන්ට හසු නොවූ වැඩසටහන් ස්වල්පයක් තව දුරටත් රූපවාහිනිය තුළ ඉතිරිව ඇත.රූපවාහිනී මාධ්‍ය තුල බටහිරින් බිහිවූ නවමු විකුණුම් සංකල්පයක් වූ Reality TV ක්‍රමයෙන් ලාංකික රූපවාහිනිය තුලට නොයෙකුත් ආකාර වලින් පැමිණෙන විට රාජ්‍ය රූපවාහිනියද මෙය විවිධාකාරයෙන් අවශෝෂනය කර ගැනීමට උත්සාහ කළ අතර එහි නවතම උත්සාහය Sri Lankan Life ලෙස ඉදිරිපත් වේ.ගායනය හා වාදනය යන ඉසව් වල තරගාවලියක් ලෙස පවතින මෙහි ගායනය ඉසව්ව රියැලිටි ආකෘතිය දක්වා නොගිය සම්ප්‍රදායික ගීත තරගාවලියක් වන අතර යම් පූර්ව තෝරාගැනීමකින් පසුව තරගය සදහා සම්ප්‍රදායික ගීත ඉදිරිපත් කරනු ලබයි.මාගේ නිරීක්ෂනයට අනුව ශ්‍රී ලාංකික විද්යුත් මාධ්‍ය ජනප්‍රිය වැඩසටහන් අතුරින් මෑත කාලයේ ශ්‍රී ලාංකික සංස්කෘතික ප්‍රගමනය සදහා වඩාත්ම බලපෑමක් කළ ඉසව්ව ලෙස දැකගත හැක්කේ Sri Lankan Life හි වාදන තරගකරුවන් අතර පැවැත්වෙන තරගයයි.ඉන්දියානු රාගධාරී සංගීතයේ ස්වර අතර හිරවෙමින් ගයන ගායකයින් අතර වඩා ගවේෂණශීලි වූ වාදකයින් සැබෑ කොටම දියුනු සංස්කෘතියක් ජීවිතයක් හිමි ලාංකිකයෙකු පහළ වීමේ පූර්ව පෙරනිමිති පහළ කරයි.කේමදාස මාස්ටර් විසින් එළිපෙහෙළි කරන ලද සංගීතයේ නිම්වලළු තව තවත් ව්‍යාප්ත කළ නදීක ගුරුගේ, අජිත් කුමාරසිරිලාට පිස්සන් යැයි කියන චක්‍රබ්ලාස් විශ්වවිද්‍යල ඔළු සහිත සංස්කෘතික විවෘතභාවයට බිය ලාංකිකයින්ගේ සීමා පුළුල් කිරීමට දක්වනු ලබන මෙම උත්සාහය පැසසිය යුතුය.ලංකාවේ සිව්දෙස විසිරී සිටින සංගීත භාණ්ඩ වාදකයින් යම් යම් අත්හදාබැලීම් සිදුකරමින් ක්ෂේත්‍රයේ සිටින තරුණ ජවය රටට ඉදිරිපත් කිරීම බලාපොරොත්තු උපදවන සුළුය.ඉල්ලුම් සැපයුම් න්‍යායට අනුව බස් අජිත්ලා, කිංග්ස්ලිලා, භාතිය සංතුෂ්ලාට හිරවෙමින් පවතින ලාංකික සංගීතයට නවමු මුහුණුවරක් ඉදිරිපත් කළ රූපවාහිනියේ උත්සාහය අගය කළ යුතුය.රැකියා නොකරන ගෘහනියන්ට නිවසේ ජීවත් වන හැටි කියා දීමට නුගසෙවණ ද, රන්දෙපැය වෙනුවෙන් විකල්ප මෙහා නාට්‍යය ඉදිරිපත් කරමින් වෙළදපොළ තරගයට ඉදිරිපත් වූ රූපවාහිනිය තුළ සුරම්‍ය රාත්‍රිය, Sri Lankan Life වැනි උත්සාහයන් ප්‍රාග්ධන තර්කනයට බිලිවීමට මොහොතකට පෙර බිහිවූ නිර්මාණයන් වන්නේ මෙකී වැඩසටහන් වලින් ලබන ලාභය අඩුවූ සැනින් මේවා සදහා නැවතීමේ තිත තැබෙන බැවිනි.එතැනින් පසු සම්භාව්යා සංගීතය මිල යාන්ත්‍රණය යටතේ අඩු ප්‍රේක්ෂක පිරිසක් ඉලක්ක කොටගත් ඉහළ මිලකින් යුතුවීම වලක්වනු නොහැක. (චිත්‍ර කලාව දැන් මේ තත්ත්වයට පත්ව ඇත)හදගමලා , විමුක්තිලා ගෙනා නවමු සිනමාව දරාගත නොහැකි ලාංකික බල අධිකාරයන් එකී නිර්මාණ කරුවන් ද්‍රෝහීන් ලෙස හංවඩු ගසන විට සියළු බාධක දරාගෙන ශක්තිමත්ව නැගී සිට ප්‍රේමසිරි කේමදාස නම් වූ අසහාය පෞරුෂය සිය සතුරන් තමන් ළග දණ ගැස්සවීමට සමත් විය. තමන් විසින් දායාද කළ අපූර්වතම නිර්මාණ හැරුණුකොට හෙළිපෙහෙළි කරදුන් මාර්ගයේ යෑමට සුදානම් ලංකාවේ සිව්දෙසින් සුසැදි දැනුමෙන් සන්නද්ධ තාරුණ්‍යය දුටුවානම් ඔහු අහිංසක සතුටක් ලබනු නොඅනුමානය.තත්ත්වයන් හරිහැටි තෙරුම් නොගත් රූපවාහිනියේ මෙකී වැඩසටහන නිෂ්පාදකයන් SMS මගින් වාදන තරගකරුවන් ‍තේරීමේ ක්‍රියාව තරගකරුවන්ට සිදුකරන අසාධාරණයක් මෙන්ම වැඩසටහනේ තත්ත්වයද පළුදු කරනු ලැබුවද මෙහි සිටින වාදකයින්ගේ දක්ෂතාව හේතුකොට එම කරුණු යම් තාක් මකා දමනු ලබයි.එක් පසෙකින් ශ්‍රී ලාංකික ඉතිහාසයේ දරුණුතම මූලධර්මවාදය ක්‍රියාත්මකව පවතින යුගයක සංගීතය, සිනමාව, සාහිත්‍ය වැනි සකලවිධ කලාවන් තුලින් මූලධර්මවාදයන්ට ‍එරෙහි ප්‍රතිරෝධය සුබවාදී හැගීමක් ඇති කරයි.සෞන්දර්යේ නිම් ඉම් සොයා යන ඔබට Sri Lankan Life මගහැරුණේ නම් ඉරිදා රාත්‍රී 9.05ට පමණ ජාතික රූපවාහිනිය නරඹන්න.